Axut! & Artedrama konpainiak Gayarre Antzokiko eszenatokira itzuliko dira gaur asteazkena arratsaldeko 20:00etan “Hondamendia” euskarazko antzezlanarekin. Harkaitz Canoren testuarekin eta Ximun Fuchs-en zuzendaritzapean, ekoizpen honek zaborra darabil metafora gisa gertuko gertakarietan arakatzeko, hala nola Zaldibarko zabortegiaren erorketan edo pandemian. Ander Lipus, Maite Larburu, Manex Fuchs, Ruth Guimerà, Eneko Gil, Ane Sagués nafarra eta Jon Ander Urresti dira Iruñeko Udalarekin elkarlanean koliseo iruindarrera iritsiko diren hogei bat pertsonaia hezurmamituko dituzten antzezleak.
KANTUA ERRESILIENTZIARI
“Edozer gauza jar dezakegu zabor-poltsa batean, auzoko kontainer batean bota eta hurrengo segunduan sortutakoaz ahaztu. Baina horrek ez du esan nahi hura desagertu denik”. Hauxe Harkaitz Cano antzerkigileak erabilitako abiapuntua zentzu metaforikoan gizarteak azken urteetan sortu duen zaborrari buruz hausnarketa sakona egiteko. Zabor hori ikusi nahi ez badugu ere, bertan darrai.
Horrela, ikuskizunaren ardatza “pentsaeraren ibilbidea agerian uztea da: kontraesanak, esaten dena, egiten dena eta nahi dena”. Erronka pertsonaien barne-munduan kokatzen da. “Erbesteratuak bezala, pertsonaiak gailu konektatuen bidez komunikatzen dira beraien artean, norberak bere arrangurak, dudak eta ikaragarrizko presioa ezin zuzenean partekatuz. Espazio berezi horretan, iragana eta orainaldia gurutzatuko dira”, azaltzen du Ximun Fuch zuzendariak.
Eszenatokitik hogei bat pertsonaia pasako dira, bakoitzak bere esperientzia indibidualak azalduz, kolektiboarenak ere badirenak, umoreari, gizatasunari, samurtasunari edo ironiari uko egin gabe.
Emanaldirako sarrerak hemen edo txarteldegian eros daitezke asteartetik larunbatera 12:00etatik 14:00etara eta 17:30etatik 20:30etara.